کچه‌ نازداره‌که‌م

(5/9/2009)...خالد ڕه‌نجده‌ر

کچه‌ نازداره‌که‌م

خونچه‌ی

باخی به‌هاره‌که‌م

هیوای گه‌وره‌م

شیرین ڕه‌فتاره‌که‌م

ئه‌ی ڕووناکی خێزانه‌که‌م،

له‌دایک بوونی تۆ و

گه‌وره‌ بوونت،

په‌روه‌رده‌ و ڕه‌وشت فێربوونت

له‌ باوه‌شی

پڕ سۆزی دایکێکدا

پێکه‌وه‌ ژیانی منتان ڕوناک کرد

*      *      *

چه‌ند خۆشه‌ پرسیاره‌کانت

له‌ کوێی؟

که‌ی دێیته‌وه‌؟

که‌ ناوه‌که‌ت له‌سه‌ر شاشه‌ی

مۆبایله‌که‌م ده‌رئه‌که‌وێ

هێشتا ده‌نگت نه‌هاتووه‌

پرسیاره‌کان

وه‌ک لای لایه‌

له‌ گوێما ئه‌زرینگێنه‌وه‌،

شه‌وقی گه‌ڕانه‌وه‌م

پشووی ماندوو حه‌سانه‌وه‌م

نیگا و خۆشه‌ویستی تۆی تێدایه‌

کچه‌ نازداره‌که‌م

*     *     *

بوونی تۆ له‌ ژیانی مندا

سامان و به‌هره‌یه‌

ژیانه‌وه‌یه‌،

ڕێی به‌هه‌شته‌

دادوه‌رییه‌

هه‌زار و یه‌ک تاقی کردنه‌وه‌یه‌،

نابینی په‌نجه‌ی توڕه‌ بوون

ڕاوه‌شێنم

ده‌ستم بۆ لێدان بڵند که‌م

بت ترسێنم

پاداشتی خوایی له‌ده‌ست ده‌م

تۆش له‌ خۆم بڕه‌نجێنم